KABUL, 22 qershor – Numri i të vdekurve nga një tërmet në Afganistan sot në mesditë arriti në 1,000, thanë zyrtarët e menaxhimit të fatkeqësive, me më shumë se 600 të lënduar dhe numri pritet të rritet ndërsa informacionet rrjedhin nga fshatrat e largëta malore.
Shtëpitë u shndërruan në rrënoja dhe trupat e mbështjellë me batanije shtriheshin në tokë, treguan fotografitë në mediat afgane. Helikopterët u vendosën në përpjekjet e shpëtimit për të mbërritur te të lënduarit me furnizime mjekësore dhe ushqime, tha zyrtari i ministrisë së brendshme Salahuddin Ayubi.
“Numri i të vdekurve ka të ngjarë të rritet pasi disa nga fshatrat janë në zona të thella në male dhe do të duhet kohë për të mbledhur detaje,” tha ai.
Tërmeti i së mërkurës ishte më vdekjeprurësi në Afganistan që nga viti 2002. Ai goditi rreth 44 km nga qyteti juglindor i Khost, pranë kufirit me Pakistanin, tha Shërbimi Gjeologjik i SHBA (USGC). Zyrtarët e menaxhimit të fatkeqësive thanë se të paktën 1,000 janë vrarë dhe 600 të plagosur. Megjithatë, zyrtarët lokalë thonë se numri i të plagosurve është më i madh.
“1,000 të vdekur, 1,500 të plagosur, dhe ky numër mund të rritet, shumë familje kanë humbur. Të plagosurit janë dërguar në Kabul dhe Gardez,” tha për Reuters Mohammad Amin Hozaifa, drejtor i informacionit dhe kulturës në Paktika.
Shumica e vdekjeve të konfirmuara ishin në provincën lindore të Paktikas, ku 255 njerëz u vranë dhe më shumë se 200 u plagosën, shtoi Ayubi. Në provincën e Khost, 25 ishin të vdekur dhe 90 ishin dërguar në spital.
Haibatullah Akhundzada, lideri suprem i talebanëve në pushtet, shprehu ngushëllimet e tij në një deklaratë.
Ngritja e një operacioni shpëtimi do të jetë një provë e madhe për talebanët, të cilët morën kontrollin e vendit gushtin e kaluar dhe që janë përjashtuar nga shumë ndihma ndërkombëtare për shkak të sanksioneve të ndërmarra prej tyre.
Lëkundjet u ndjenë nga rreth 119 milionë njerëz në Pakistan, Afganistan dhe Indi, tha EMSC në Twitter, por nuk kishte raporte të menjëhershme për dëme apo viktima në Pakistan. EMSC e vlerësoi magnitudën e tërmetit në 6.1, megjithëse USGC tha se ishte 5.9.
Sfidës për autoritetet afgane i shtohen edhe përmbytjet e fundit në shumë rajone, për të cilat agjencia e fatkeqësive tha se kishte vrarë 11, plagosur 50 dhe bllokuar pjesë të autostradës.
Fatkeqësia vjen pasi Afganistani po përballet me një krizë të rëndë ekonomike që kur talebanët morën pushtetin ndërsa forcat ndërkombëtare të udhëhequra nga SHBA u tërhoqën pas dy dekadash lufte.
Në përgjigje të marrjes së pushtetit nga Talibanët, shumë vende vendosën sanksione ndaj sektorit bankar të Afganistanit dhe shkurtuan ndihmën e zhvillimit në vlerë prej miliarda dollarësh.
Megjithatë, ndihma humanitare ka vazhduar me funksionimin e agjencive ndërkombëtare, si Kombet e Bashkuara.
Zyra e OKB-së për Koordinimin e Çështjeve Humanitare (UNOCHA) tha se Afganistani u kishte kërkuar agjencive humanitare të ndihmonin në përpjekjet e shpëtimit dhe ekipet po dërgoheshin në zonën e goditur nga tërmeti.
Një zëdhënës i Ministrisë së Jashtme tha se talebanët do të mirëprisnin ndihmën ndërkombëtare. Pakistani fqinj tha se po punonte për të zgjeruar ndihmën.
Pjesë të mëdha të Azisë Jugore janë aktive sizmike sepse një pllakë tektonike e njohur si pllaka indiane po shtyn në veri pllakën euroaziatike.
