Në një ditë si sot dhe pikërisht më 25 shkurt 1877, u lind studiuesi dhe albanologu i shquar austriak, Prof. Dr. Norbert Jokli. Dr. Jokli do të mbaronte shkollimin e tij me shkëlqesa të lavdërueshme (“summa cum laude”) dhe do të konsiderohej që në rini, si një nga studiuesit më të mirë të kohës në fushën e gjuhësisë e kryesisht në lëmin e gjuhëve indo-evropiane. Albanologu do të hidhte vështimin e tij studimor në gjuhën tonë, duke kryer studime të kalibrit botëror. Në mbështetje edhe të studimeve të Gustav Majerit e të Pedersenit, Dr. Jokli do e cilësonte shqipen si vazhdimësi të ilirishtes dhe të trakishtes. Me ardhjen në fuqi të nazizmit në Austri, studiuesi do të përndiqej për shkak të origjinës së tij hebraike. Kundërvënia ideologjike ndaj prejardhjes së tij do t’i kushtonte edhe jetën. DPA-ja disponon një sërë letërkëmbimesh me albanologun mbi fusha të ndryshme të studimit të kulturës shqiptare.
