Në një ditë si sot dhe pikërisht më 6 Shkurt 2014, u nda nga jeta këngëtarja emblematike Vaçe Zela.
Ajo ishte një figurë udhëheqëse në industrinë e muzikës dhe konsiderohet si një nga muzikantet më me ndikim të shekullit të 20-të në Shqipëri, Kosovë dhe Maqedoninë e Veriut.
Lindur më 7 Prill 1939 në Lushnjë dhe e rritur në Tiranë, ajo tregoi një interes të madh për muzikën që në moshë të vogël përpara se të fillonte një karrierë profesionale si muzikante në vitin 1962.
Njëmbëdhjetë herë fituese e Festivalit të Këngës në RTSH ajo ndërtoi reputacionin e saj si një muzikante shumë e suksesshme duke fituar edicionin e parë.
Të parët që zbuluan talentet e Vaçe Zelës ishin mësuesit e saj të shkollës. Ajo nuk ishte e talentuar vetëm në muzikë, por edhe në pikturë dhe teatër. Ajo ishte vetëm dhjetë vjeç kur filloi të këndonte këngë popullore nga krahina e Myzeqesë. Ajo shpesh këndonte rastësisht në qytetin e saj të Lushnjës, duke tërhequr kalimtarët. Së shpejti ajo do të merrte pjesë në koncerte të vogla të organizuara në qytet, ndonëse prindërve të saj nuk u pëlqente shumë ideja që vajza e tyre mori një rrugë të tillë. Megjithatë, ajo shkoi në Tiranë për të konkuruar për të studiuar në Liceun Artistik, por nuk u pranua dhe ndoqi shkollën e mesme Qemal Stafa, ku filloi të mësonte kitarën.
Ajo fillimisht u emërua në Ansamblin e Ushtrisë dhe më pas në Ansamblin e Shtetit. Zela ishte fituesja e parë e Festivalit të Këngës në RTSH me këngën “Fëmija i parë”, më 26 dhjetor 1962.
Vaçe Zela është vlerësuar me Urdhrin Artist i Merituar, Urdhrin Artist i Popullit dhe Urdhrin Nderi i Kombit.
Çmimet ndërkombëtare përfshijnë “Golden Disk”, “Gruaja e Vitit” në Kembrixh, Angli për ’97-’98, “Mikrofoni i Artë” nga Ministria e Kulturës së Kosovës etj. Çmimi i fundit ishte “Çmimi i Madh Special për Legjendën e Këndimit”, 45 vjetori i Festivalit në RTSH, për kontributin unik të këngëtares në Shqipëri.
