Trajneri legjendar, 75-vjeçari suedez Sven Goran Eriksson njoftoi pak ditë më parë se i ka mbetur edhe një vit jetë pasi zbuloi se është prekur nga një lloj tumori i pashërueshëm.
Në lidhje me këtë gjë, trajneri i Liverpoolit, Jurgen Klopp ka ftuar Erikssonin në Angli dhe përkatësisht në klub për t’u rikthyer në stol, ku të bëjë punën e trajnerit sërish.
“Dëgjova për herë të parë për admirimin dhe dashurinë e tij për Liverpoolin dhe se ai ka qenë tifoz i skuadrës sonë gjatë gjithë jetës së tij”, tha Klopp në një konferencë për shtyp.
“Ai është shumë i mirëpritur dhe mund të ulet në vendin tim, në zyrën time dhe ta bëjë punën time për një ditë nëse dëshiron, nuk ka problem. Dëshiroj ta mirëpres këtu dhe t’i tregoj gjithçka dhe si është zhvilluar ky klub i mrekullueshëm ndër vite”, vazhdoi trajneri gjerman.
Shtypi anglez shkruan se ekziston mundësia që Eriksson të jetë trajner i Liverpoolit në një ndeshje legjendare kundër Ajaxit më 23 mars.
“Ai mund të vijë këtu dhe të kalojë disa orë të mrekullueshme, jam i sigurt”, përfundoi Klopp.
