Zëvendëskryeministri i Kosovës, Besnik Bislimi, ka bërë të ditur se listës së vendeve që njohin pasaportat e Kosovës i është shtuar edhe Spanja.
Sipas tij, tashmë në këtë vend mund të udhëtohet edhe pa vizë.
Zëvendëskryeministri Bislimi ka thënë se Drejtoria e Përgjithshme për Migrim dhe Punë të Brendshme e Bashkimit Evropian (DF Home) ka njoftuar se Spanja i njeh pasaportat e Kosovës.
“Spanja është një destinacion i shtuar në vendet e zonës Shengen ku mund të udhëtojmë përmes liberalizimit, ku pengesë më herët ishte mosnjohja e pasaportës sonë.
Vazhdojmë të sjellim lajme të tjera të mira, të cilat ndikojnë pozitivisht te qytetarët tanë”, ka shkruar Bislimi në Facebook.
Kujtojmë se Spanja është një nga pesë vendet e BE-së që nuk e njeh Kosovën si shtet të pavarur.
