Partia Demokratike e Elly Schlein është gati të bëjë thirrje për përjashtimin e kryeministrit shqiptar Edi Rama dhe Partisë së tij Socialiste të Shqipërisë nga Partia Socialiste Evropiane (PSE). Këtë ai ia ka bërë të ditur Giuseppe Provenzano, kreut të Punëve të Jashtme të PSE, në kuadër të kongresit të PSE që do të mbahet në Malaga në ditët në vijim. Akuza kryesore ndaj Ramës është marrëveshja e nënshkruar me Giorgia Meloni, e cila parashikon transferimin në Shqipëri të një numri të konsiderueshëm emigrantësh të kapur nga anijet italiane, deri në 36 mijë në vit, për t’u strehuar në objektet në portin e Shëngjinit dhe në Gjader. Partia Demokratike Italiane thekson se kjo marrëveshje shkel të drejtën ndërkombëtare dhe vlerat e Partisë Socialiste Europiane: “Marrëveshja – tha Provenzano – shkel të drejtën ndërkombëtare dhe “gjithashtu vlerat e familjes socialiste”. Edi Rama, me Partinë e tij Socialiste të Shqipërisë, është anëtar vëzhgues i PSE, por duket se nuk ka gjasa të marrë pjesë në kongresin në Malaga. Italia do të përpiqet të zbatojë të njëjtën procedurë dëbimi që u përdor për kryeministrin e ri sllovak, Robert Fico, i përjashtuar nga PSE në tetor për shkak të pozicioneve të tij pro-ruse dhe aleancës së tij me të djathtën ekstreme, pak pasi fitoi zgjedhjet në Sllovaki. Përjashtimi politik i Ramës nga familja e socialistëve europianë mund të ketë pasoja në kandidaturën e Tiranës për në Bashkimin Europian, një ide e mbështetur nga Rama dhe Meloni. Pavarësisht kritikave dhe kundërshtimeve të brendshme, Rama vijon të mbrojë marrëveshjen, duke përsëritur se ajo nuk cenon të drejtën ndërkombëtare. Njëkohësisht, ai nënvizoi se marrëveshje të ngjashme në të kaluarën kërkuan edhe vende të tjera evropiane, por Shqipëria i refuzoi këto kërkesa. Qëndrimi i Ramës është ai i një vendi që është i përkushtuar të mbështesë Italinë duke pasur parasysh mungesën e një zgjidhjeje mes anëtarëve të Bashkimit Evropian për menaxhimin e flukseve të migracionit.
