Në një ditë si sot dhe pikërisht më 26 gusht 1938, i sëmurë prej tuberkulozit, dha frymën e tij të fundit poeti Millosh Gjergj Nikolla, i njohur gjerësisht me pseudonimin Migjeni. Pas pesë muajsh në Sanatorium San Luigi pranë Torinos ku ishte shtruar ai u transferua në spitalin Valdensian në Torre Pellice ku ndërroi jetë.
Lindi në Shkodër në një familje të varfër qytetare.
Gjatë viteve 1933-1937 punoi si mësues filloreje në Vrakë, Shkodër dhe në Pukë. Kjo kohë përkon edhe me zhvillimin e veprimtarisë së tij letrare.
Në lidhje me trashëgiminë e tij, Robert Elsie shkruan: “Megjithëse Migjeni nuk botoi asnjë libër gjatë jetës së tij, veprat e tij, të cilat qarkulluan privatisht dhe në shtypin e asaj periudhe, patën një sukses të menjëhershëm. Migjeni i hapi rrugën letërsisë moderne në Shqipëri dhe vdekja e tij në moshën njëzet e gjashtë vjeçare ishte një humbje tragjike për letërsinë bashkëkohore shqipe”.
