Anastas Nika, aktor i mirënjohur shqiptar u nda nga jeta në moshën 63-vjeçare pas një beteje të gjatë shëndetësore.
Anastas Nika aktor shqiptar, ka lindur në Sopik të Sarandës më 5 janar të vitit 1960.
Filloi studimet e mesme në Shkollën e Kulturës në Tiranë, në degën e regjisurës, por përjashtohet në vit të tretë, pasi këndonte dhe u mësonte të tjerëve këngë të huaja, gjë e cila, nuk e lejohej në sistemin e atëhershëm monist. Si rrjedhojë, dënohet dy vite, duke u punësuar, si punëtor, në fabrika të ndryshme. Mandej, kryen dy vite shërbimin e detyrueshëm ushtarak, duke hapur tunele e ndërtuar bunkerë për makina e mjete të rënda ushtarake.
Pasi përfundoi shërbimin ushtarak, për pesë vite punoi punëtor në një fabrikë tullash, ku aty, për pak, desh humbi jetën, si rrjedhojë e punës në kushte të vështira.
Gjatë kësaj kohe punonte natën, për t’u aktivizuar ditën me trupën e Teatrit të qytetit të Sarandës, një nga ëndrrat dhe pasionet e tij .
Përfundoi shkollën e mesme për Agronomi. I jepet mundësia për të kryer një kurs për regjisor, pranë Teatrit Kombëtar, Tiranë. Vetëm në periudhën 1986-1990, iu plotësua një nga dëshirat e tij të mëdha jetësore: përfundoi me shumë sukses dhe i dalluar për rezultate, studimet në Akademinë e Arteve të Bukura, në Tiranë, për aktor. Pas diplomimit emërohet aktor në Teatrin Profesionist të Elbasanit.
Me fillesën e proceseve demokratike, u rikthye në në qytetin e Sarandës dhe filloi ushtrimin e profesionit të tij në Teatrin e Estradës si aktor edhe regjisor.
Ka punuar si Specialist i Lëndës së Teatrit në shkollat e mesme të qytetit si dhe në kursin e Teatrit, pranë Qendrës Kulturore të Fëmijëve, Sarandë.
Për afro një çerekshekull ka arritur të zbulojë dhe punojë seriozisht dhe me ngulm profesional me talente të rinj , të cilët, paskëtaj, kanë përfunduar Akademinë e Arteve në Shqipëri dhe në vende të tjera të Europës.
Vitet e fundit atij i është dashur të luftojë me një sëmundje të rëndë. Të afërm dhe miq të shumtë iu gjendën pranë për ta ndihmuar. Por këtë të mërkurë Anastas Nika mbylli sytë përgjithmonë.
