Silvio Berlusconi, miliarderi dhe ish-kryeministri italian, i cili dikur e përshkroi veten si “Jezus Krishti i politikës”, ka vdekur në një spital të Milanos në moshën 86-vjeçare, konfirmoi sot zyra e tij e shtypit.
Berlusconi ishte diagnostikuar kohët e fundit me leuçemi, tha Spitali San Raffaele i Milanos. Ai ishte shtruar më parë në spital me probleme në frymëmarrje dhe bëri një kontroll të premten.
Politikani, i cili konsiderohej prej kohësh si figura publike më e gjallë e Italisë, u zgjodh kryeministër tre herë dhe shërbeu për gjithsej nëntë vjet, më shumë se kushdo që nga diktatori fashist Benito Musolini.
I mbiquajtur me dashuri “Il Cavaliere” (Kalorësi), karriera e tij u shënua nga një sërë skandalesh politike, financiare dhe personale, shumë prej të cilave e çuan atë në gjykatë.
Ai u gjykua me akuza që varionin nga evazioni fiskal dhe ryshfet, deri te korrupsioni dhe seksi me një prostitutë të mitur. Por vetëm një rast ngeci – një dënim i vitit 2012 për evazion fiskal në një marrëveshje që përfshin të drejtat televizive.
Berlusconi mbeti jashtë parlamentit në vitin 2013. Por asnjëherë nuk hoqi dorë, ai u rishfaq në fillim të vitit 2018 si një burrë shteti i moshuar, kreu i një aleance të krahut të djathtë që përfshinte partinë e tij Forza Italia.
Pasi Gjykata e Milanos i dha atij “rehabilitimin” më vonë atë vit, duke hequr efektivisht ndalimin e rihyrjes së tij në politikë që ishte në fuqi pas dënimit të tij për mashtrim tatimor në vitin 2012, ai njoftoi se do të kandidonte për një vend në Parlamentin Evropian.
Ai u zgjodh në maj të vitit 2019, në moshën 83-vjeçare dhe mbeti në detyrë si deputet i Parlamentit Evropian deri në çastin e vdekjes së tij.
Berlusconi udhëhoqi gjithashtu partinë e tij Forza Italia, të cilën e ringjalli në 2013 pasi u largua nga partia Populli i Lirisë, në fitore me koalicionin e qendrës së djathtë me Giorgia Meloni dhe Matteo Salvini në shtator 2022, megjithëse ai nuk kishte portofol qeveritar.
Berlusconi la pas pesë fëmijë: Piersilvio dhe Marina nga martesa e tij e parë me Carla Dall’Oglio, e cila përfundoi në 1985, dhe Luigi, Eleonora dhe Barbara nga martesa e tij me Veronica Lario, e cila përfundoi në 2012.
