Presidenti Biden tha të martën se ishte “i befasuar” kur mësoi se dokumentet e klasifikuara u gjetën në zyrën e tij personale pasi ai shërbeu si zëvendëspresident dhe nuk e di se çfarë ndodhet në regjistrime, pasi udhëheqësit demokratë dhe republikanë në Capitol Hill kërkuan më shumë informacion rreth një zbulimi që ka nxitur një rishikim nga Departamenti i Drejtësisë.
Dokumentet e klasifikuara, rreth 10 gjithsej, u gjetën në Qendrën Penn Biden për Diplomaci dhe Angazhim Global, një institut në qendër të Uashingtonit që Biden e filloi pas largimit nga Shtëpia e Bardhë në 2017. Avokatët personalë të Biden i gjetën dokumentet më 2 nëntor dhe menjëherë ia dorëzuan ato Administratës Kombëtare të Arkivave dhe Regjistrimeve (NARA). Shtëpia e Bardhë konfirmoi të hënën se po bashkëpunonte me Departamentin e Drejtësisë.
“Unë u informova për këtë zbulim dhe u befasova kur mësova se paska dokument qeveritar që u dërgua atje në atë zyrë,” tha Biden në një konferencë shtypi në Mexico City të martën në mbrëmje. “Por unë nuk e di se çfarë ka në dokumente. Avokatët e mi nuk më kanë sugjeruar të pyes se çfarë dokumentesh ishin. Unë i kam kthyer kutitë – ata i kanë kthyer kutitë në Arkiv. Dhe ne jemi duke bashkëpunuar plotësisht – duke bashkëpunuar plotësisht me rishikimin, i cili shpresoj se do të përfundojë së shpejti dhe do të ketë më shumë detaje.”
