SHBA po ndërmerr hapa për të mbështetur perspektivat për diplomacinë, edhe nëse nuk ka përparime të dukshme në horizont, sipas raporteve të veçanta nga The Washington Post dhe The Wall Street Journal.
Këshilltari i Presidentit Biden për sigurinë kombëtare, Jake Sullivan, udhëtoi në Kiev të premten për bisedime me presidentin Volodymyr Zelensky dhe tha se “nuk do të ketë asnjë lëkundje” në mbështetjen e SHBA për Ukrainën, pavarësisht nga rezultati i zgjedhjeve afatmesme.
Por ndërsa disa republikanë bëjnë thirrje për shkurtimin e ndihmës ushtarake për Ukrainën, administrata mund të jetë gjithnjë e më e etur për të eksploruar një zgjidhje të mundshme për luftën. The Post raportoi se administrata Biden po i inkurajonte privatisht liderët në Kiev të sinjalizonin një hapje për të negociuar me Rusinë.
Në veçanti, administrata i ka kërkuar Ukrainës që të heqë dorë nga refuzimi i saj për t’u përfshirë në bisedime nëse Presidenti Vladimir Putin nuk hiqet nga pushteti. Në shtator, Zelensky deklaroi: “Ne do të negociojmë me presidentin e ri”.
Zyrtarët amerikanë i thanë The Post se nuk po e shtynin Ukrainën në tryezën e bisedimeve, por argumentuan se një qëndrim i tillë mund të ndihmojë Kievin të ndërtojë mbështetje në pjesë të Evropës, Afrikës dhe Amerikës Latine që janë të shqetësuara për efektet shkatërruese të luftës.
Nga ana tjetër, Mykhailo Podolyak, një këshilltar i lartë i Zelensky, përsëriti një postim në Twitter sot se Ukraina nuk do të negociojë me Putinin.
Këshilltari për sigurinë kombëtare, Jake Sullivan, djathtas, dhe Andriy Yermak, shefi i shtabit të Zelensky, gjatë një konference për shtyp në Kiev të premten.
