Në një ditë si sot dhe pikërisht më 9 shtator të vitit 1946 nis Kryengritja e Postribës. Në përgjigje të terrorit komunist të ushtruar nga Mehmet Shehu (siç dihet vetë ishte me origjinë nga Mallakastra), i cili urrente veriorët dhe udhëhiqte vetë masakrat ndaj Shkodrës, kryengritësit sulmuan kazermat e partizanëve pushtues dhe burgun e qytetit ku mbaheshin qindra të pafajshëm.
Jup Kazazi, kreu i kryengritjeve antikomuniste të Shkodrës, me katër vëllezër dolën në mal që më 29 nëntor të 44, dhe Partia Komuniste deklaroi dënimin me vdekje të pesë vëllezërve, edhe pse kishin luftuar kundër fashizmit edhe nazizmit.
Gjatë përgatitjes së kryengritjes së Postribës, Sigurimi i Shtetit ka qenë vazhdimisht në dijeni. Kreu i tij ka qenë Zoi Themeli i cili gjithashtu është një figurë tragjike sepse e pësoi edhe vetë më vonë, por ka qenë angazhuar gjithë armata e partisë popullore, njëjtë si në Kryengritjen e Kelmendit.
Po atë ditë terrori komunist ekzekutoi me pushkatim 65 njerëz dhe vijoi me të tjera ngjarje kriminale, djegie shtëpish e arrestime.
Kryengritja e Postribës shënohet në histori si i pari kundërshtim i armatosur i Malësisë së Mbishkodrës në Shqipëri kundër pushtetit komunist, por edhe në gjithë kampin komunist në Europën Qendrore dhe Lindore.
